Kryeministri Edi Rama nderoi këtë pasdite me një ceremoni në kryeministri, sakrificën e “Dëshmorit të Atdheut” Anri Kashiku dhe aktin heroik të rojes bregdetare Igli Shahinaj
Në nderim të sakrificës së “Dëshmorit të Atdheut” Anri Kashiku, 18 vjeçarit, që humbi jetën në plazhin e Durrësit për të shpëtuar jetën e dy të rinjve, njëri prej të cilëve vëllai i tij, – u mbajt sot një ceremoni e posaçme në mjediset e Kryeministrisë, ku familjarëve iu dorëzuan nga Kryeministri Rama shenjat e posaçme të kujtimit dhe mirënjohjes së kombit, simboli i “Familjes së Dëshmorit të Atdheut”.
“Është një detyrim i yni që të nderojmë çdo shqiptar, në radhë të parë këta lloj shqiptarësh, njerëz të zakonshëm, të panjohur, me familje krejt të zakonshme. Kjo na bën të kujtojmë edhe njëherë që heronjtë, dëshmorët nuk janë njerëz të rënë nga qielli, por janë njerëz shumë të zakonshëm, të cilët në një moment të caktuar, bëjnë dicka të jashtëzakonshme dhe vendosin veten në një piedestal në altarin e atdheut.” – u shpreh kryeministri Rama teksa i dorëzoi simbolin e mirënjohjes babait të Anri Kashikut. m.k
