Berisha pritet të udhëtojë drejt SHBA-së në shtator, dokumentet konfirmojnë pjesëmarrjen në Konventën Republikane
Kryetari i Partisë Demokratike, Sali Berisha, pritet të udhëtojë drejt Shteteve të Bashkuara në fillim të shtatorit, për të marrë pjesë në Konventën Kombëtare Republikane që do të zhvillohet në Dallas më 9 dhe 10 shtator.
Berishës iu hoq në qershor 2026 sanksioni që i ndalonte hyrjen në SHBA. Pas këtij zhvillimi, kryedemokrati ka deklaruar në disa raste se së shpejti do të udhëtonte drejt Shteteve të Bashkuara.
Të dhënat për një udhëtim të mundshëm të Berishës në SHBA mbështeten edhe nga dokumentet e siguruara nga Top Channel. Njëri prej tyre, i lëshuar nga International Democrat Union (IDU), mban titullin “Konfirmim për pjesëmarrjen tuaj në delegacionin e IDU për Konventën Kombëtare Republikane”.
Në letrën drejtuar Berishës konfirmohet pjesëmarrja e tij në delegacion dhe theksohet rëndësia që i jepet pranisë së tij në aktivitetin e Partisë Republikane amerikane.
“IDU është e kënaqur që ju do të na bashkoheni ne dhe ne jemi konfidentë se pjesëmarrja juaj në këtë mbledhje historike për Partinë Republikane do të jetë me shumë vlerë për Partinë Demokratike të Shqipërisë. Detaje të tjera në lidhje me lëvizjet e delegacionit, akreditimin dhe programin e eventit do t’ju komunikohen nga sekretariati i IDU”, thuhet në dokument.
Edhe avokati i Berishës, Genc Gjokutaj, ka publikuar në rrjetet sociale ftesën për aktivitetin, duke e shoqëruar me një koment politik.
“Berisha në ShBA! Me status aleat!
Rama në Tiranë me Gysin në burg! Me status bashkëpunëtor!”, shkruan Gjokutaj.a.b
