Deputeti socialist Erion Braçe u ndal sot në fjalën e tij në Kuvend te tregtimi i grurit nga Serbia, që sipas tij importohet më shtrenjtë sesa çmimi që grumbulluesit ja marrin bujqve në Divjakë.
Po ashtu i njëjti fenomen vërehet dhe në produkte të tjera, ku grumbulluesit caktojnë çmimet me telefonatat, duke shkaktuar milionë lekë humbje te bujqit.
“Askush nuk merret me grurin përveç grabitqarëve që rrisin çmimet. Më vjen që të kujtoj se ajo domatja që është sot në pjatë, kushton vetëm 30 lekë atje në Lushnje, patatja 22 lekë, qepa 20 lekë. Gruri që ka qenë 8 muaj në tokë, dje në Tërbuf kushtonte vetëm 36 lekë për kilogramë, humbja është edhe më e madhe për parcelat që kanë prodhuar nën rendiment.
Ua bëra llogarinë javën e kaluar, se me çmimin 42 lekë të grurit, bujqit sërish dalin me humbje. Çfarë t’iu them atyre bujqve atje që gruri që vjen nga Serbia blihet me 51 lekë, dhe në Tërbuf nuk e blejnë grurin as me 42 lekë. Pse i bëni ata njerëz që të braktisin vendin, dhe të shkojnë atje jashtë dhe të punojnë si skllevër.
Shteti iu ka dhënë vetëm para grumbulluesve, pa asnjë kusht, për t’u tallur me djersën e bujqëve. Brenda një dite maskarenjtë i flasin njëri tjetrit me telefona, dhe e merrnin dje shalqinin me 24 lekë nga 32 lekë që e morën një ditë më parë. Çfarë ndodhi brenda një dite? Ata njerëz që ne të bardhë, të kuq, iu shkojmë dhe iu kërkojm votën”, tha Braçe në Kuvend.
