Dy vëllezërit e njohur të ekranit Romeo dhe Donald Veshaj u dënuan me 2 vite burg që më pas u ul në 1/3 dhe kaloi me shërbim prove.
Ngjarja ka ndodhur në vitin 2013 ndërsa Donaldi nuk e ka përmendur këtë fakt gjatë qëndrimit të tij në Big Brother. Akuzuesi e tërhoqi akuzën por prokuroria këmbëngul më faj. Tani çështja ka shkuat në Gjykatën e Lartë.
Ata u akuzuan për akuzën e “plagosjes së rëndë me dashje” të kryer në bashkëpunim.
“Gjykata e rrethit Vlorë i deklaroi fajtor Donald dhe Romeo Veshajn, duke aplikuar dënimin e tyre me dy vite burg. Ndaj dy vëllezërve binjakë u aplikua ulja e 1/3 së dënimit.
Por bazuar në nenin 59 të Kodit Penal vendimi i dënimit u pezullua dhe vëllezërit Veshaj u lanë në provë për një afat prej dy vjetësh, me kushtin që të mos kryejnë vepër tjetër penale. Vëllezërit Veshaj ishin të detyruar të paraqiteshin çdo tre muaj në shërbim prove dhe të njoftonin në rast të ndryshimit të vendbanimit.
Prokuroria mbeti e pakënaqur nga vendimi i shkallës së parë, duke e apeluar vendimin në Gjykatën e shkallës së dytë, me arsyetimin se vepra e vëllezërve Veshaj paraqiste rrezikshmëri të lartë shoqërore.
Pasi Shkalla e Dytë la në fuqi vendimin e Shkallës së Parë, Prokuroria e ka dërguar rastin në Gjykatën e Lartë, që ka regjistruar rekursin, duke caktuar më 27 maj seancën e parë”, shkruan mcntv që ka siguruar dosjen e tyre.
Po çfarë ndodhi në konfliktin e vitit 2013-të?
Ngjarja e ka zanafillën më 6 shkurt 2013-të kur Donald dhe Romeo Veshaj ishin gjimnazistë dhe u konfliktuan fizikisht me shtetasin me inicialet A.L.
Ky i fundit u përfshi më 6 shkurt në debat me vëllezërit Veshaj, pasi këta të fundit ndërkohë që qarkullonin me një automjet, kryen një xhirim gomash dhe veprime provokuese ndaj të dashurës së tij që ishte gjimnaziste, shtetasja me inicialet R.M.
Debati u përshkallëzua një ditë më vonë në një konflikt fizik që ndodhi pranë shkollës së mesme “Mustafa Qemal Ataturku” në lagjen Pavarësia. A.L u godit me sende të forta nga vëllezërit Veshaj, duke iu shkaktuar një paaftësi e përkohshme në masën 9 ditë. Për të dëmtuarin u kërkua një ekspertim i plotë në Institutin e Mjekësisë Ligjore në Tiranë.
Por më vonë i dëmtuari e tërhoqi ankimimin lidhur me ngjarjen. Dëmtimet ndaj tij janë klasifikuar si plagosje e rëndë, pasi kanë dhënë shëmtimin e përkohshëm të fytyrës. Po ashtu janë konstatuar thyerje të kockës së kokës, zhytje në regjionin ballor, tronditje e trurit e shkallës së mesme. Dëmtimet janë shkaktuar si pasojë e goditjeve me mjete të forta, raporton mcn tv. a.b
