Ish-kryeministri Sali Berisha tha se u njoftua për vendimin e përjashtimit nga grupi i PD nga kreu demokrat Basha. Gjysmë ore para komunikimit të vendimit për përjashtimin e tij nga grupi parlamentar i PD-së, kishte zhvilluar një telefonatë me Lulzim Bashën, tha Berisha në Opinion.
“Basha më ka marrë në telefon një gjysmë ore para se të bënte komunikimin në media. Unë i kam thënë e kuptoj që ka qenë në presion të madh, por pavarësisht nga presionet, ka vendime që njeriu nuk pranon t’i marrë kurrë. Sot PD u shndërrua në një parti pa sovranitet që dorëzohet e tëra. Nëse një force politike ja caktojnë të tjerët deputetët ajo force politike nuk mund të ekzistojë. Ka një gjë, Basha mund të futej në sanksione, PD mund të futej në sanksione, por 1000 herë më mirë të mbetej sovrane”, tha Berisha në emisionin “Opinion”.
Pjesë nga intervista:
Pyetje: Si do të uleni në Parlament? Si do të ndiheni?
Berisha: Më i motivuar se kurrë në mbrojtjen e pluralizmit të vërtetë. Basha i dha një shkelmim të tmerrshëm pluralizmit politik në Shqipëri. E shndërroi në pluralizëm fasadë.
Pyetje: A je zhgënjyer që e mbështete, që e zgjodhe?
Berisha: Absolutisht nuk e zgjodha. E zgjodhën anëtarët e PD-së në një garë të hapur. Por për vendimin e tij të sotëm ai i ka bërë goditjen më të rëndë për interesa të veta, vendit, PD-së dhe pluralizmit në Shqipëri.
Pyetje: Cili do të jetë reagimi i Berishës?
Berisha: Ajo që jam shprehur dje në intervistë, do bëj gjithçka për rivendosjen e sovranitetit të PD-së. Kemi fasadë opozitë. Do krijoj aleancë me çdo demokrat, me çdo qytetar që beson se ky vend duhet të ketë opozitë sovrane, duhet të ketë PD sovrane.
