Kryeministri Albin Kurti pas takimit me presidentin serb Vuçiç në Bruksel tha se ka propozuar një marrëveshje të paqes që ishte e balancuar, por nuk u pranua nga Serbia.
“Propozova fillimisht një marrëveshje të shkruar me gjashtë nene të një deklarate të paqes mes Kosovës dhe Serbisë që u refuzua. Marrëveshja u refuzua ende pa u lexuar. Për mua kjo tregon mos gatishmëri për marrëveshje”, tha Kurti pas takimit me Vuçiç.
“Gjithashtu zv.ministri Bislimi lexoi 11 pika që që paraqesin 11 barriera tregtare që Serbia duhej t’i eliminonte për barrierat”.
Kurti thotë se janë dakorduar që gjatë gushtit të ketë edhe një takim të delegacioneve, ndërsa një tjetër takim midis krerëve në shtator.
Kryeministri theksoi se te pika për të pagjeturit ka insistuar që të futet edhe togfjalëshi “ballafaqimi me të kaluarën”.
“U pranua propozimi nga Borrel, por jo edhe nga Vuçiq i cili nuk pranoi që të diskutohet kjo pikë. Ballafaqimi me të kaluarën është i domosdoshëm dhe më vjen keq që nuk u pranua nga Serbia që edhe ky togfjalësh të përfshihej. Nuk e kuptoj pse duhet ai të ketë frikë, ballafaqimi për të kaluarën është i domosdosshëm, është për të ardhur keq që nuk e patëm një deklaratë të përbashkët”, tha ndër të tjera Albin Kurti.
Ky ishte takimi i dytë Kurti – Vuçiq në kuadër të dialogut në Bruksel.
