Prokurori i Përgjithshëm Olsian Çela deklaroi sot nga Fieri se ka një numër të konsiderueshëm të çështjeve që janë hetuar në lidhje me krimet zgjedhore, duke paralajmëruar se shumë shpejt do të ketë rezultate që do të bëhen të ditura edhe për publikun.
“Qëllimi i vizitës lidhet me situatën e hetimit të krimeve zgjedhore nga ana e Prokurorisë gjyqësore Fier. Janë disa takime që po bëhen në disa nga prokuroritë kryesore të vendit në lidhje me krimet zgjedhore. Është e rëndësishme që nga Prokuroritë të tregohet kujdes maksimal për hetimin e plotë dhe të shpejtë si dhe për të treguar transparencë ndaj publikut dhe mediat.
Ka pasur një numër të konsiderueshëm të çështjeve që janë hetuar dhe është marrë një vendim. Prokuroria e Fierit është duke vlerësuar maksimalisht dhe bashkëpunimi që kanë me agjencitë e tjera. Shumë shpejt do të kemi rezultate dhe që do ti bëhen të ditura edhe publikut”, tha Çela.
Ai rendit edhe një arsye tjetër për të cilën zhvilloi takime në Fier: “Arsye e dytë ka të bëjë me hetimet pasurore dhe me funksionimin e një seksioni të posaçëm që prokuroria e rrethit gjyqësor fier ka sa i përket pastrimit të produktit të veprës penale dhe evazionit fiskal. Ka rëndësi për rritjen e efikasitetit në drejtim qoftë të hetimeve për pastrimin e parave por edhe në raport me zbatimin e ligjit antimafia”, tha Cela.
Ndërkohë PD ka deklaruar se Prokuroria nuk jep të dhuna në lidhje me cështjet në hetim ndërsa KAS vendosi javën e kaluar të mos kërkojë të dhëna nga isnstiucionet publike në lidhje me krimet zgjedhore apo vendime që mund të binin ndesh me ligjin zgjedhor duke shkelur kështu nenin 173 që parashikon që KQZ të mbledhë të dhëna nga institucionet publike. a.b
