Mediat greke kanë zbuluar aktivitetet e shumta por edhe një lidhje me shqiptarët të biznesmenit Dionysis Korfiatis i cili u ekzekutua sot në ishullin Zakynthos.
“Protothema” shkruan se biznesmeni 54-vjeçar disa vite më parë u dënua me 4 vite burg nga Gjykata e Apelit në Patra, pasi armët dhe materiale të tjera të paligjshme në lidhje me aktivitetet e disa shqiptarëve të akuzuar për grabitje në ishullin e Zakynthos u gjetën në shtëpinë e tij.
Korfiatis u qëllua sot për vdekje me 20 plumba ndërsa ndodhej në një zyrë kontabiliteti.
Biznesmenit pak kohë më parë iu vra gruaja në një pritë, ku vetë 54-vjeçari shpëtoi duke u larguar me shpejtësi. Për ngjarjen e sotme për mediat ka folur xhaxhai i grekut, që ishte i pranishëm në zyrën e kontabilitetit në momentin kur e qëlluan.
“Vrasësit ishin me një makinë “Fiat Panda”. Ata ndaluan, hynë brenda në zyrë, e vranë atë dhe u larguan.
Kjo ishte e gjitha” tha xhaxhai. Vrasja ndodhi në një nga ishujt e famshëm grekë ku jetojnë dhe punojnë shumë shqiptarë. a.a
