Ish-kryeministri Berisha tha se deklaratat e Milaim Bellanicës, se ia kishte dorëzuar Lulzim Bashës kasetën për masakrën serbe ndaj shqiptarëve në Krushë të Madhe ishin haluçinante.
Në intervistën me gazetaren Juli Xhokaxhi, Berisha tha se Bellanica nuk është mirë mendërisht, gjë e cila po shfrytëzohet nga armiqtë e UÇK-së dhe Kosoves.
“Këta merren me njerëz të sëmurë që kanë haluçinacionet dhe obsesionet e tyre duke i shfrytëzuar pastaj kundër shqiptarëve dhe UÇK-së”, tha ish-kryeministri.
Milaim Bellanica, dëshmitar në krimet e ndodhura në Krushën e Madhe, ka deklaruar se “pi duhan me të vdekurit”, duke iu referuar masakrës në fshatin e Rahovecit.
Ai ka deklaruar edhe se nëna e tij e ka gjetur duke folur me personat që nuk jetojnë më, shkruan Gazeta Ekspress.
“Çdo ditë më thonë si po shkel mbi gjakun tonë. Flas me ata, komunikoj me të vdekurit. Edhe pij duhan. I kam marrë duhanin, i kam thënë si nuk qohesh me pi duhan, ja kam marrë duhanin. Çdo ditë më thonë a të kujtohet kur ma more duhanin?”, deklaroi ai për emisionin në T7.
“E shoh trupin e tij, vjen trupi e shoh, flas me ta. Dy herë nana me ka nxa tu folë me të vdekurit. Gjithkujt i duket absurde, por mua më ndodhin”, shtoi ai.
