Presidenti amerikan Donald Trump ka fituar 15 votat elektorale në Karolinën e Veriut, pas një gare të fortë në këtë shtet federal me Joe Biden. Me këtë fitore, republikanët e mbajnë këtë bastion, që llogaritet në mesin e shteteve kyçe apo përcaktuese në zgjedhjet presidenciale.
Trump tani ka 232 vota elektorale, ndërkaq Biden, i cili është shpallur fitues i zgjedhjeve të 3 nëntorit, ka tashmë 290 vota elektorale, duke korr sukses në shtetet ku Trump kishte fituar më 2016, në Pensilvani, Miçigen, Uiskonsin dhe Arizonë.
Trump kishte bërë fushatë intensive në Karolinën e Veriut, me tubime në pikun e pandemisë, duke përfshirë tubimet në Fayetteville, Winston-Salem dhe Greenville, disa javë para zgjedhjeve.
Ai kishte planifikuar që të mbante Konventën e Republikanëve në këtë shtet, por u tërhoq pas përplasjes verbale me guvernatorin demokrat, i cili kishte vendosur kufizime për shkak të koronavirusit.
Ndryshe nga mediat e tjera, Associated Press, ende nuk e ka projektuar fituesin në shtetin federal të Xhorxhias, ku të premten ka nisur rinumërimi me dorë i të gjitha votave.
Nga numërimi paraprak, presidenti i zgjedhur Joe Biden, ka një epërsi të ngushtë edhe në Xhorxhia ndaj presidentit Donald Trump.
Nderkaq nje gjykatë në shtetin Miçigan refuzoi të premten një kërkesë nga mbështetësit e presidentit amerikan Donald Trump për të bllokuar çertifikimin e votave dhe emërimin e një audituesi të pavarur në Detroit, ku u votua në masë pro Presidentit të zgjedhur Joe Biden.
Vendimi shënon një hap prapa për Presidentin Trump dhe republikanët që po përpiqen të përmbysnin fitoren e zotit Biden në zgjedhjet e 3 nëntorit, duke penguar zyrtarët të vërtetojnë rezultatet e zgjedhjeve.
“Do të ishte një ushtrim i pashembullt i aktivizmit gjyqësor nëse kjo gjykatë ndalon procesin e çertifikimit në qarkun Uejn nga ana e bordit të numërimit të votave,” shkruante Timothy Kenny, kryegjyqtar i Qarkut të Tretë Gjyqësor të Miçiganit që përfshin Detroitin.
Gjyqtari i hodhi poshtë pretendimet, duke shkruar: “Interpretimi i ngjarjeve nga paditësi është i pasaktë dhe jo i besueshëm”.
Ai vuri në dukje se akuzat, të tilla si inkurajim nga punonjës të adminsitratës së qytetit që njerëzit tua jepnin votën demokratëve, nuk mbështeteshin në hollësi të tilla si vendi ose koha kur kishin ndodhur ngjarje të tilla.
Gjyqtari tha gjithashtu se një person që kishte paraqitur dëshmi nën betim, kishte postuar në Facebook para zgjedhjeve pretendimin se demokratët po përdornin pandeminë si mbulesë për të mashtruar në zgjedhje. Kjo sipas gjyqtarit e dëmtonte dëshminë dhe besueshmërinë e personit në fjalë.
Të mërkurën, ekipi i Presidentit Trump ngriti një padi të ngjashme në Gjykatën e Qarkut Perëndimor të Miçiganit.
Fushata dhe republikanët kanë ngritur gjithashtu padi në shtetet Xhorxhia, Pensilvani dhe Uiskonsin me synimin për të bllokuar çertifikimin e rezultateve zgjedhore.
Studiuesit e ligjit kanë thënë se proceset gjyqësore që sfidojnë rezultet e zgjedhjeve janë më të efektshme nëse ngrihen në gjykatat e shteteve e jo të qarqeve dhe se vendimi i Gjykatës së Qarkut Uejn mund të minojë përpjekjet e ekipit të zotit Trump në gjykatën federale.
Miçigani pritet t’i çertifikojë rezultatet më 23 nëntor.
