Koronavirusi ka futur në ankth Italinë ndërkohë që masa drastike janë marrë mbrëmë në orët e vona nga qeveria. Deri tani shënohen dy viktima ndërkohë numri i të prekurve që rezultojnë pozitiv ndaj këtij virusi sa vjen e rritet. Në dy rajonet ku është përhapur virusi janë Lombardia dhe Veneto. Dy viktima janë shtetas italianë. Një 78 vjeçar në Veneto dhe një 77 vjeçare në Lombardi.
Një rast i ri u verifikua në rajonin e Lazios në komunën Civitavecchia në afërsi të Romës. Italia renditet e katërta në botë dhe e para në Europë për nurmin e të prekurve nga kjo epidemi.
Ndërkaq në Lombardi, janë në karantinë 11 bashki dhe 50 mijë njerëz. Ndërkohë është pezulluar puna dhe lëvizja në zonat e prekura.
Një 17-vjeçar banues në Valtellina por që studion në komunën Codogno ku u verifikua rasti i parë i infektuar nga virusi, rezultoi pozitiv nga koronavirusi.
Qeveria italiane miratoi mbrëmë një draft ligj me masa speciale për të evituar përhapjen e epidemisë së koronavirusit në nivel kombëtar. Masat speciale të hartuara pas 4 orësh mbledhje të jashtëzakonshem të këshillit të ministrave janë parashikuar për zonat ku janë verifikuar persona të infektuar nga koronavirus.
Ky draft ligj synon të garantojë sigurinë e shëndetit publik në të gjithë territorin italian duke mos lejuar largimin e personave nga zonat ku janë verifikuar rastet pozitive nga koronavirus, pra në 10 komunat e Lombardisë e në 1 komunë në Veneto.
