Gjykata e Korçës la dje në arrest me burg 18-vjeçarin Devis Hoti, i dyshuar për vrasjen e Flamur Ducit në fshatin Mborje.
I riu me precedent penal deklaroi se është i pafajshëm përpara gjykatës, por Gjykata ka administruar provat e Prokurorisë, te cilat i konsideron shume te forta për ta dënuar të riun.
E para, prokuroria thotë se ka siguruar një fije floku të gjetur në dorën e viktimës dhe njollat e gjakut në veshjen e autorit të dyshuar, që përputhen me ADN-në. Hoti ka pasur dëmtime fizike nga përleshja me viktimën, edhe pse ai thotë se këto dëmtime i ka nga një përplasje e disa ditëve më parë.
Nga këqyrja e marketit në pronësi të Ducit është vërejtur mungesa e thikës që shërbente për prerjen e bulmetit. Përveç kësaj, në pllaka janë vënë re pika gjaku, që janë marrë në cilësinë e provës.
Mësohet se Duci është qëlluar tetë herë me thikë, në fytyrë dhe zemër. Sipas organit të akuzës, Flamur Duci ka tentuar të heqë bluzën në momentin që kushëriri e ka qëlluar disa herë me thikë dhe i ka vënë flakën për ta djegur.
Së dyti, prokuroria thotë se ka siguruar dëshmi kontradiktore të prindërve të 18-vjeçarit. Përveç kësaj, në një bisedë ambientale, i riu dëgjohet duke i diktuar xhaxhait të tij se çfarë duhet të thotë për grupin e hetimit.
“Të lutem, deklaro kështu se më more në qafë,” mësohet të jetë shprehur ai.Deri më tani mungon një motiv për arsyen që e ka shtyrë të riun drejt këtij krimi të rëndë.
/DRONI.al/
