Një 30 vjeçar shqiptar ka rënë në prangat e policisë gjermane pasi gjatë një kontrolli të automjeteve në autostradën gjermane A3 në afërsi të Aschaffenburgut në Bavari, policia i gjeti 12.9 kilogramë kokainë me një vlerë të llogaritur në tregun e zi prej rreth 1.1 milion euro.
Shqiptari ishte prej shumë kohësh në vëzhgim të policisë e cila kishte dyshime të forta se ai ishte pjesë e një bande që merreshin me shitjen e lëndëve narkotike.
Droga ishte instaluar në mënyrë profesionale dhe ishte fshehur në pjesë të ndryshme të veturës, ka njoftuar të premten prokurori në Ellëangen dhe policia kriminale në Aalen.
30-vjeçari thuhet se kishte ardhur nga Holanda dhe donte të shkonte në Aalen.
Shqiptari ka qenë anëtar i një bande të rrezikshme të trafikimit të lëndëve narkotike.
Hetimet kundër bandës së drogës kanë vazhduar për muaj të tërë. Tre anëtarët e tjerë të dyshuar të bandës, 21 vjeç, 22 vjeç dhe 53 vjeç, tashmë ishin arrestuar në shtator. Pas arrestimit ata janë mbajtur në paraburgim.
