Zjarri masiv që përfshiu mbrëmjen e së premtes kodrat mbi Himarë dhe u përhap drejt zonave të banuara ka shkaktuar dëme të konsiderueshme. Shtatë banesa janë përfshirë nga flakët, ndërsa situata vijon të mbetet aktive edhe mëngjesin e sotëm.
Gjatë orëve të para të mëngjesit situata është vënë disi nën kontroll, ndërsa me zbardhjen e ditës ka nisur edhe ndërhyrja nga ajri. Helikopterët janë angazhuar për goditjen e vatrave aktive dhe për frenimin e përhapjes së flakëve.
Rreth 460 efektivë dhe punonjës të strukturave të ndryshme janë angazhuar në terren për përballimin e situatës. Rreth 300 prej tyre janë forca zjarrfikëse, të mbështetura nga automjete dhe ekipe të MZSH-së nga Fier, Tiranë, Tepelenë, Himarë, Vlorë, Finiq, Delvinë, Sarandë, Gjirokastër dhe Dropull.
Në operacion janë përfshirë gjithashtu forca të Policisë së Shtetit, strukturat e Bashkisë Himarë, Urgjenca Mjekësore dhe Qendra Vullnetare e Emergjencave Civile. Fokusi i tyre ka qenë evakuimi dhe siguria e banorëve e turistëve, si dhe mbështetja e ekipeve zjarrfikëse.
Në ndihmë të strukturave civile janë angazhuar edhe 160 efektivë të Forcave të Armatosura, të cilët po kontribuojnë në izolimin e vatrave dhe vënien nën kontroll të zjarrit.
Flakët u përhapën gjatë natës drejt zonave të banuara, duke detyruar autoritetet të ndërmarrin masa evakuimi. Ndërhyrja nga ajri nuk ishte e mundur gjatë orëve të errëta për shkak të kufizimeve të operimit të mjeteve ajrore zjarrfikëse.
Aktualisht, forcat në terren po ndërhyjnë në disa drejtime, me qëllim izolimin e vatrave aktive dhe parandalimin e përhapjes së zjarrit drejt zonave të banuara.
Deri tani nuk raportohet për persona të lënduar. a.b
