Nga ngjarja e mëngjesit të së premtes në Shkodër, ku u qëllua me armë zjarri Fatbardh Lici, u gjet dhe një automjet i djegur pranë vendit të ngjarjes.
Burime nga grupi hetimor thonë se automjeti i cili dyshohet se u përdor në atentatin ndaj Fatbardh Licit, është vjedhur në Tiranë.
Sipas Abc News, makina tip “Benz” u vodh në kryeqytet dy javë më parë. E njëjta makinë, dyshohet se u përdor në vrasjen e 53-vjeçarit Lici, në lagjen Kiras në zonën e njohur si ish-Poçeria.
53-vjeçari Fatbardh Lici po pinte kafen e mëngjesit në lokal rreth orës 6 e 45 minuta, ku pas 5 minutash, u ekzekutua me armë zjarri nga një person me maskë.
Autori pasi qëlloi rreth 15 herë në drejtim të tij është larguar me shpejtësi nga vendi i krimit.
Policia e Shkodrës ka shoqëruar 18 persona në komisariat, të cilët pasi janë marrë në pyetje janë liruar. E vetmja pistë që po hetohet është hakmarrja, pasi 53-vjeçari ka qenë i dyshuar për vrasjen e Astrit Kurmemajt, ngjarje e ndodhur 2011-ën.
