Shqiptarët që jetojnë në Greqi tashmë për të marrë një leje drejtimi nga ky shtet mjafton vetëm që të dorëzojnë atë shqiptare.
Është miratuar vendimi për njohjen e ndërsjelltë të lejeve të drejtimit mes dy vendeve, mes Shqipërisë dhe Greqisë.
Vendimi do të lehtësojë jetësën e shtetasve shqiptarë, të cilët punojnë dhe jetojnë në shtetin fqinj, ku sipas statistikave janë rreth 500 mijë shqiptarë emigrantë të ligjshëm në Greqi.
E botuar në fletoren zyrtare, marrëveshja lejon që qytetarët shqiptarë të cilët kanë leje drejtimi shqiptare të mos rifillojnë procedurat e kualifikimit dhe të provës për marrjen e një patente greke e cila ka dhe një kosto financiare që shkon nga 700 deri në 1000 euro.
Ky është një tjetër hap i rëndësishëm pas zgjidhjes së çështjes së regjistrimit të fëmijëve shqiptarë të lindur në Greqi dhe tërheqjes së rezervës nga Greqia për përdorimin e Vulës Apostile.
