Dajë e nip janë arrestuar pas konfliktit me armë zjarri me pronarin e një lokali “Lloto Sporti” në Elbasan. Policia e këtij qyteti informon se ndërhyrja e uniformave blu parandaloi përshkallëzimin e mëtejshëm të këtij konflikti me armë.
Në nojftimin e policisë thuhet se: “Konflikti ka nisur fillimisht mes shtetasit Fjodor Berati me pronarin e lokalit, A.B 48 vjeç, dhe më pas nipi i Fjodorit shtetasi Fatjon Pllumbi ka marrë armën e zjarrit kallashnikov dhe ka qëlluar në ajër në afërsi të lokalit” Informoi policia.
Konflikti ka nisur për motive të dobëta dhe nga të shtënat nuk ka persona të lënduar.
Në pranga kanë rënë Fatjon Pllumbi, 20 vjeç dhe Fjodor Berati, 29 vjeç, të dy banues në lagjen Shën-Koll Elbasan. Arrestimi në flagrancë i shtetasve u bë për veprat penale “Prodhimi dhe mbajtja pa leje e armëve luftarake dhe e municionit”, “Kanosje”, kryer në bashkëpunim”, “Prishja e Qetësisë Publike kryer në bashkëpunim” .
Në cilësinë e provës materiale është sekuestruar arma tip kallashnikov me një karikator me 12 fishekë , si dhe dy gëzhoja .
Materialet në ngarkim të këtyre shtetaseve do ti kalojnë Prokurorisë së Rrethit Gjyqësor Elbasan për veprime të mëtejshme.
