Historia tragjikomike e krijimit të Këshillit të Lartë të Prokurorisë, që ka prodhuar një ngërç të madh institucional dhe po fut në krizë klasën politike me çështjen e zgjedhjes së Kryeprokurorit të ri, duket se do të marrë zgjidhje.
Nga procesverbali i grupit të punës pranë Avokatit të Popullit që mban datën e sotme sekretari i përgjithshëm Fatbardh Zenelaj konfirmon se në momentet e fundit të afatit zyrtar tre nga pesë kandidatet e shoqërisë civile Alfred Balla, Entela Hoxha dhe Andi Muratej kanë arritur të plotësojnë të gjitha kriteret formale ligjore.
Këtë lajm e ka konfirmuar për Klan Plus edhe nënkryetarja e Kuvendit Vasilika Hysi. Ne këtë mënyrë pritet që pas seancës dëgjimore të së premtes, lista me tre kandidatët t’i paraqitet komisionit të shoqërisë civile i drejtuar nga Andi Dobrushi dhe më tej Kuvendit që do të zgjedhë me votim një prej tyre në përbërje të KLP.
Mbyllja e këtij procesi i hap dritën jeshile jo vetëm zgjedhjes se kryeprokurorit te ri, por edhe votimit në kuvend të kandidatëve për këshillin e lartë gjyqësor dhe krijimit të njësisë antikorrupsion SPAK.
