Kryetari i Partisë Demokratike, Lulzim Basha priti sot Kryeministrin e Kosovës, Ramush Haradinaj, në një takim të ngrohtë dhe miqësor. Lulzim Basha i uroi suksese kryeministrit Haradinaj në detyrën e re dhe me shumë përgjegjësi në drejtimin e qeverisë së Kosovës. Kryetari i Opozitës e siguroi Haradinajn për mbështetjen e plotë e të gjithanshme të Partisë Demokratike në rrugën e integrimit europian dhe euroatlantik të Kosovës, dhe në përballimin e sfidave të tjera.
Integrimi europian dhe euroatlantik i Kosovës, është në interes të sigurisë dhe stabilitetit jo vetëm të Kosovës, por të mbarë rajonit, u shpreh Lulzim Basha.
Kryetari i PD, me tej theksoi se Partia Demokratike, ashtu siç ka qenë që në ditët e para të themelimit të saj, një mbështetje e fuqishme dhe konstante e aspiratave të popullit të Kosovës, do të vazhdoje të jetë gjithmonë një zë aktiv në familjen e partive simotra të PPE, dhe më gjerë, për të përkrahur me forcë interesat e Kosovës.
Gjithashtu, nuk do te mungoje asnjëherë edhe mbështetja konkrete për njohjen nga shtete të tjera, përmes kontakteve dhe raporteve që Partia Demokratike ka me forca të rëndësishme politike në Europë dhe vende te tjera.
Nga ana tjetër, të dy personalitetet theksuan rolin që Partia Demokratike me autoritetin e padiskutueshëm që gëzon në Kosove, mund të luajë rol në drejtim të zhvillimeve pozitive edhe të vetë politikës aty, në bashkëpunim me të gjithë spektrin politik kosovar.
