PDIU i ka bërë apel sot, Presidentit, për të mbledhur tryezën e partive parlamentare, për të gjetur një zgjidhje për të kapërcyer krizën e besimit.
“Presidenti të mbledhë tryezën e partive parlamentare për një pakt kombëtar.
Thelbi dhe qëllimi i propozimit tonë, ka të bëjë me shmangien e krizës mes palëve që me mungesën e krizës së besimit, rrezikojnë zgjedhjet.
Ky pakt synon marrëveshjen e partive për zgjedhje me standard.
Pakti kombëtar synon përmirësimin e sistemit institucional dhe ngritjen e institucioneve të reja të drejtësisë. Le të nisim një tryezë të përbashkët nga ku të gjithë bashkë ne të dalim vetëm me një zgjidhje.
Atë zgjidhje që ne ia kemi detyrim qytetarëve.
Partia për Drejtësi, Integrim dhe Unitet sugjeron urgjencën e thirrjes së tryezës politike nga ana juaj për të gjetur një zgjidhje të menjëhershme politike. Në mënyrë që nesër ju të mos jeni të detyruar të thërrisni tryezën e Këshillit të Sigurisë Kombëtare”, u shpreh në emër të PDIU, kreu i kësaj partie, Shpëtim Idrizi.
Sipas Idrizi, në rast të mungesës së një zgjidhje, parashikohet që qytetarët ta kërkojnë zgjidhjen në rrugë të tjera.
DRONI.al
Pakti Kombëtar 7-pikësh, i propozuar disa ditë më parë nga PDIU
1. Kthimin e Opozitës në Parlament për miratimin e akteve ligjore, që do i hapnin rrugën zbatimit të reformës në drejtësi, përparimit të vendit në integrimin evropian dhe realizimin e disa ndryshimeve në kuadër të legjislacionit zgjedhor dhe masave të tjera, për të siguruar atmosferë të qetë dhe të besueshme, për zgjedhjet e 18 qershorit.
2. Garantimin e rolit të paanshëm në zgjedhje të Policisë së Shtetit.
3. Ndryshimin e sistemit zgjedhor në sistem proporcional me një zonë zgjedhore, për krijimin e mundësive reale për të garuar forcat politike jashtë koalicioneve.
4. Depolitizimin e anëtarëve të KZAZ-ve, KQV-ve dhe GNV-ve, ose rritjen e numrit të anëtarëve në komisionet e numërimit, me përfaqësues të partive parlamentare
5. Krijimin e një grupi të posaçëm me urdhër administrativ të Prokurorit të Përgjithshëm, krijimin e një “task force” prokurorësh të atashuar pranë KQZ-së, e cila ka për detyrë të hetojë në mënyrë urgjente të gjitha sinjalizimet për blerje vote, kërcënim, intimidim, etj. Gjithashtu edhe dërgimin e çështjeve të lidhura me cenimin e procesit zgjedhor brenda 24 orësh në gjykatë, duke ashpërsuar masat për “krimin elektoral”.
6. Ngarkimin e një strukture inxhinierike konsensuale që do të përgatisë në mënyrë urgjente një projekt teknik, për variantet e mundshme të realizimit të numërimit elektronik, apo edhe vlerësimin e mundësive të realizimit të votimit elektronik, nëse ai konsiderohet i sigurt dhe i mundshëm në kohë, në një procedurë të miratuar në mënyrë konsensuale nga të gjitha partitë parlamentare.
7. Thirrjen e tryezës së partive politike parlamentare për fillimin e dialogut, me qëllim miratimin e një kandidature konsensuale si President të Republikës së Shqipërisë.
