Kryetari i Partisë Demokratike, Sali Berisha, ka shprehur ngushëllimet për ndarjen e papritur nga jeta të profesor Artan Pogonit, një prej emrave më të njohur të sportit dhe volejbollit shqiptar.
Përmes një mesazhi të publikuar në rrjetet sociale, Berisha vlerëson kontributin e Pogonit si sportist, trajner, pedagog dhe studiues, duke e cilësuar humbjen e tij si një dhimbje të madhe për familjen, sportin shqiptar, studentët dhe Partinë Demokratike.
Mesazhi i kreut të PD-së, Sali Berisha:
“Dielli perëndoi përgjithmonë për Artan Pogonin.
Të dashur miq, Profesor Artan Pogoni krejt papritmas dhe shumë parakohe mbylli sytë përgjithmonë.
Sporti dhe volejbolli shqiptar humbën sot një prej sportistëve, trajnerëve, pedagogëve dhe akademikëve të vetë më të shquar; familja Pogoni humbi njeriun e dashur e të pazëvendësueshëm, bashkëshortin dhe prindin shembullor; studentët humbën pedagogun e përkushtuar, ndërsa Partia Demokratike humbi një prej drejtuesve të saj më të përkushtuar, i cili dha një kontribut të veçantë në krijimin dhe drejtimin e Departamentit të Sporteve.
Pasioni i Artan Pogonit për sportin nisi që në rini, ku ai u afirmua si lojtar volejbolli dhe më pas vijoi karrierën si trajner. Përvoja e tij në parket dhe njohja e thellë e sportit e orientuan më vonë drejt edukimit të brezave të rinj dhe drejtimit profesional të ekipeve sportive.
Në vitet e fundit, ai ishte i angazhuar edhe si trajner kryesor i Barleti Volley, duke kontribuar me përkushtim në zhvillimin e volejbollit universitar dhe elitar në Shqipëri.
Duke shprehur nderimin më të madh dhe mirënjohjen më të thellë për kontributin e tij tejet të çmuar si sportist i talentuar, trajner i apasionuar, studiues e profesor i përkushtuar në fushën e sportit, si dhe për bashkëpunimin e ngushtë që kemi patur, ndaj zinë dhe dhimbjen për këtë humbje të rëndë dhe të pakompensueshme me familjen e tij të nderuar, miqtë dhe të afërmit, studentët. Lutem së bashku me ta që shpirti i mirë i prof. Artan Pogonit të gjejë paqen e merituar!
U prehsh në paqe, Artan Pogoni! Amin!”
