LSI i është përgjigjur ditën e sotme Partisë Socialiste, pasi disa eksponentë të saj hodhën poshtë propozimin e kreut të kësaj partie për krijimin e një qeverie besimi.
Ka qenë deputetja Kejdi Mehmetaj, e cila përmes një statusi në “Facebook” fton aleatët në qeveri që të lënë arrogancën dhe karriget për të treguar se sa shumë e duan vendin.
Postimi i plotë i Kejdi Mehmetaj
Mbrëmë Kryesia e LSI mori vendimin e saj të prerë në interes të vendit dhe zgjidhjes së krizës politike. Qartazi u shprehëm se heqim dorë nga çdo mandat dhe pozicion i yni për të siguruar stabilitet dhe qetësi për shqiptarët.
Ne hoqëm dorë nga çdo gjë, tani është radha që secili të heqë dorë nga diçka! Nëse vërtet e doni vendin aq sa e thoni me fjalë, boll me arrogancë dhe mendjemadhësi, por me vepra konkrete lëshoni pak nga karriget dhe pushteti se kjo është ajo që presin qytetarët.
