Të gjithë punonjësit e policisë si dhe punonjësit që paguhen nga buxheti i shtetit duhet të deklarojnë se asnjë prej familjarëve apo rrethit familjar nuk do të kultivojnë bimë narkotike.
Kështu është shprehur Drejtori i Drejtorisë Vendore të Policisë Dibër Edmond Tarkaj gjatë Konferencës Rajonale në Dibër. Tarkaj ka prezantuar një plan masash për Parandalimin e Kultivimit të Bimëve Narkotike.
Gjithashtu sipas këtij plani, të gjithë blegtorët dhe fermerët që kanë tokë me qira, në rast do të evidentohet kultivim i bimëve narkotike apo zjarrvënie e qëllimshme do të mbajnë përgjegjësi ligjore pavarësisht se janë apo jo autor të veprës penale. Ligji parashikon sanksione ligjore edhe për ata persona që janë në dijeni të veprës penale por nuk e denoncojnë atë.
Të pranishëm në këtë konferencë ishin Prefekti i Qarkut Dibër, Drejtori i Drejtorisë Vendore të Policisë Dibër dhe strukturat në vartësi të kësaj Drejtorie, Kryetarët e Bashkive të Qarkut Dibër, Administratorët e Njësive Administrative, Kryetarët e fshatrave nga të tre rrethet Dibër, Bulqizë dhe Mat.
Pjesë e kësaj konference ishin dhe përfaqësues të institucioneve, agjencive ligj-zbatuese, si dhe të shkollave. Nga Drejtoria e Policisë së Shtetit mori pjesë Drejtori i Drejtorisë për Krimet në Policinë e Shtetit Drejtues i Parë Skënder Kalemi.
Kalemi theksoi se Policia e Shtetit nuk do të tolerojë askënd që do të tentojë të kultivojë bimë narkotike në të gjithë territorin e vendit si dhe deklaroi se do të vijojnë kontrollet si nga toka ashtu edhe nga ajri.
ABSURDI/ Kush kultivon kanabis, ndëshkohen me fis e me farë
