Prurjet e lumit Osum kanë nxjerrë në breg trupin e pajetë të 47-vjeçarit, Jani Vrushaj, i cili u kthye nga Greqia që në datën 6 shkurt dhe askush nuk e pa më të gjallë.
Kanë qenë banorët e zonës në afërsi të fshatit Tapi, në rrethin e Kuçovës, të cilët mesditën e sotme kanë parë në breg të lumit trupin e pajetë dhe menjëherë kanë kërkuar ndihmën e policisë.
Ekspertët hetimorë mbërritën menjëherë në vendin e ngjarjes, ku u bë identifikimi i trupit të pajetë që sipas familjarëve rezulton të jetë Vrushaj, i cili u kthye nga Greqia gati tre javë më parë, por që nuk mbërriti kurrë i gjallë pranë të afërmve.
Më 9 shkurt, familjarët e tij dhanë larim se babai i dy fëmijëve ishte kthyer nga emigrimi, ku jetonte prej vitesh së bashku me bashkëshorten dhe dy vajzat, por nuk shkoi në banesën e vjehrrit të tij në fshatin Poshnje, ashtu siç dhe kishte njoftuar.
Familjarët zbuluan gjurmë të tij në breg të lumit Osum në Bashkinë e Urës Vajgurore dhe në datën 10 dhe 11 shkurt nisën kërkimet për gjetjen e trupit të pajetë, por pa rezultat.
Gjetja e trupit të pajetë sot nxori në dritë dyshimet e të afërmve sipas të cilëve, në një moment depresioni nga i cili vuante prej kohësh 47-vjeçari i dha fund jetës duke u mbytur në lumë.
EMRI/ U zhduk pas kthimit nga Greqia, Osumi nxjerr trupin e 47-vjeçarit në Kuçovë
