Policia e Durrësit bëri të ditur se ka gjetur një sasi tritoli të vendosur në katin e 18 të një pallati 20 katësh në zonën e Shkëmbit të Kavajë.
Ngjarja është konstatuar paraditen e djeshme kur shtetasi E.Sh. 19 vjeç, banues në Tiranë, njoftoi se, në lagjen Nr.13 (Shkëmbi i Kavajës), në katin e 18-të të godinës 20 – katëshe në pronësi të babait të tij, kishte konstatuar 6 kallëpë të dyshuar me lëndë plasëse.
“Menjëherë në vendngjarje kanë shkuar Efektivet e Policisë, të cilët kanë ushtruar kontroll të imtësishëm në objekt dhe rezultoi se në dy kollonat e betonit ne katin e 18-të (të pa përfunduar) gjendeshin të vendosura nga 3 kallëpë, të dyshuar me lëndë plasëse, të cilat u sekuestruan në cilësinë e provave materiale”, thuhet në njoftimin e policisë.
Ndërkaq policia e Krujës ka konstatuar një rast tjetër të dinamitit.
“Më datë 24.02.2017, rreth orës 03:15, në fshatin Borizanë, Krujë është vendosur dhe ka shpërthyer një sasi e vogël lënde plasëse, në mjetin tip Peugeot, në pronësi të shtetasit A.H. 39 vjeç, banues në Borizanë, Krujë. Mjeti ka qenë i parkuar pranë banesës. Për pasojë janë shkaktuar dëme të vogla materiale ku është krisur xhami i parë”, raporton policia. Droni.al
