Zona e Abruzzos në Itali është shndërruar në një depozitë gjigante të krimit shqiptar, shkruan në numrin e saj të sotëm gazeta Il Messaggero, në edicionin e Abruzzos.
“Vrasës, plantacione kudo dhe përplasje me policinë, teksa Abruzzo është shndërruar në një depozitë gjigante të krimit shqiptar, i aftë që brenda një viti të trafikojë mbi 400 kilogramë, apo 2 mijë kilogramë, nëse llogariten edhe rajonet e Puglias, Lombardisë, Trentino Alto Adiges e Lazios”.
“Abruzzo në këtë mënyrë kontribuon në prodhimin e përgjithshëm kombëtar të vendit me shqiponjën me dy koka, duke parë që vetë ministri i brendshëm shqiptar ka thënë kohët e fundit se si në Shqipëri një pjesë e mirë e shtetit social, i garantuar nga të ardhurat nga jashtë, tani mbahet me marijuanën”.
Ndërkaq, krimi shqiptar në Abruzzo ka marrë një goditje të rëndë nga Drejtoria Distriktuale Antimafia e L’Aquilas, që në bashkëpunim me karabinierët, ka mbyllur hetimet për 67 të dyshuar, ndër ta edhe italianë, të përfshirë në trafikun e sasive të mëdha të drogës.
Kapo i organizatës është Filip Koroveshi, rezident në San Salvo, i cili e sillte drogën nga Brindisi në Abruzzo me makinë të marrë ne qira ose me autobus, ndërsa figurë e spikatur është Elmas Mersini, i cili mban kontaktet me organizatën nënë në Vlorë dhe me futjen në Shqipëri të të ardhurave nga marijuana në rajonin abrucez.
Midis mbi një mijë faqeve të informacionit, një kapitull i kushtohet rrjedhjes së lajmeve nga ana e policisë shqiptare për hetimet nga ana e karabinierëve. Shefi i madh i organizatës, Elton Barjamaj (edhe ai nën hetim nga DDA e L’Aquilas) është përgjuar teksa fliste në telefon me një anëtar të organizatës së “spiunit” që mundësoi sekuestrimin e 420 kilogramëve marijuanë, të cilit i ka thënë se ka marrë vesh nga “xhaxhai”që është nën hetim. Vëllai i të hetuarit është polic në seksionin e narkotikëve, i transferuar në drejtorinë e policisë së Fierit me rekomandim pikërisht nga i hetuari.
Gazeta italiane Il Messaggero: Abruzzo “depozita” kanabisit shqiptar
