Policia e Shtetit ka finalizuar në Peshkopi një tjetër fazë të operacionit të koduar “Fast”, në kuadër të bashkëpunimit me autoritetet italiane për lokalizimin dhe kapjen e personave të shpallur në kërkim ndërkombëtar.
Gjatë operacionit, të zhvilluar nga Drejtoria e Forcës së Posaçme Operacionale, në bashkëpunim me Drejtorinë Vendore të Policisë Dibër, u kap dhe u arrestua Gëzim Dani alias Gëzim Hidri, 40 vjeç, i shpallur në kërkim ndërkombëtar nga Interpol Roma.
Sipas Policisë së Shtetit, Dani është dënuar me 9 vjet burgim nga Gjykata e Apelit të Napolit, me vendimin e datës 15 nëntor 2021, për veprat penale “Organizata kriminale” dhe “Shfrytëzimi i prostitucionit”.
Autoritetet italiane e kanë dënuar 40-vjeçarin pasi dyshohet se ka shfrytëzuar vajza nga Europa Lindore për prostitucion në zonën e Napolit, gjatë vitit 2009.
Kapja e tij u realizua nga specialistët e Sektorit për Kërkimin (FAST Albania) në Drejtorinë e Forcës së Posaçme Operacionale në Drejtorinë e Përgjithshme të Policisë së Shtetit, në bashkëpunim me shërbimet e DVP Dibër.
Policia bën me dije se operacioni është zhvilluar në vijim të bashkëpunimit përmes Interpol Tiranës dhe homologëve italianë, me qëllim lokalizimin dhe kapjen e shtetasve të shpallur në kërkim ndërkombëtar.
Pas arrestimit të 40-vjeçarit, Interpol Tirana, në bashkëpunim me Interpol Romën, vijon procedurat për ekstradimin e tij drejt Italisë, ku pritet të vuajë dënimin e dhënë nga autoritetet gjyqësore italiane.a.b
