Policia e Shtetit ka finalizuar dy faza të tjera të operacionit të koduar “The Wanted”, në bashkëpunim me autoritetet italiane, duke çuar në arrestimin në Itali të dy shtetasve shqiptarë të shpallur në kërkim ndërkombëtar.
Sipas Policisë, të arrestuarit janë dënuar ose akuzohen për vepra penale që lidhen me tentativën e vrasjes, shitjen e lëndëve narkotike dhe posedimin e kundërligjshëm të municionit luftarak.
Në Itali u arrestua Muhamet Bedulla, 33 vjeç, i shpallur në kërkim pasi Gjykata e Korçës e ka dënuar në vitin 2018 me 10 vjet burgim për veprën penale “Vrasja me dashje”, mbetur në tentativë.
Sipas të dhënave të Policisë, në vitin 2017, Bedulla ka tentuar të vrasë shtetasin A. S., babain e personit me të cilin ishte konfliktuar në Korçë. Gjatë ngjarjes, ai e ka plagosur tre herë me mjet prerës, thikë.
Nga dënimi i dhënë nga Gjykata e Korçës, 33-vjeçarit i kanë mbetur për të vuajtur edhe 3 vjet e 4 muaj burgim.
Gjithashtu, në Itali është arrestuar U. B., 26 vjeç, ndaj të cilit Gjykata e Elbasanit ka caktuar në vitin 2025 masën e sigurisë “Arrest në burg”, për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe i municionit”.
Sipas Policisë së Shtetit, në vitin 2024, U. B. është kapur duke shitur lëndë narkotike Cannabis Sativa. Ai akuzohet gjithashtu se ka mbajtur në banesë sasi të konsiderueshme fishekësh luftarakë dhe dy krehra pistolete.a.b
