Klement Balili ka mbështetje të madhe brenda administratës dhe policia ka cuar një dosje në prokurori lidhur me dekonspirimin të paktën 8 aksioneve policore për arrestimin e tij.
“Policia i ka dërguar prokurorisë një dosje në lidhje me personat e dyshuar si informatorë apo bashkëpunëtorë të Klement Balilit të cilët janë funksionarë të administratës shtetërore, apo pjesëtarë të agjensive të zbatimit të ligjit, që nga policia e shërbimi sekret që akuzohen se kanë bashkëpunuar me Klement Balilin, që kanë lehtësuar qarkullimin e tij. Këta persona po hetohen pasi i kanë dhenë informacion Kelmend Balilit për lëvizjet e policisë dhe operacionet që janë organizuar për arrestimin e tij. I gjithë ky grup bashkëpunëtorësh është në verifikim, prokuroria do sigurojë provat e duhura”, u shpreh gazetari investigativ Artan Hoxha.
“Organizata e financuar nga Klement Balili ka një bazë të vetën në qytetin e Fierit dhe zotërojnë kryesisht linjën e trafikut të drogave të forta që vijnë nga vendet e Amerikës Latine, kryesisht nga Ekuadori. Ajo përpunohet këtu dhe shpërndahet në vendet evropiane. Pikërisht për këtë arsye kjo organizatë është vënë edhe në shënjestrën e autoritete amerikane”, tha Hoxha.
Hoxha tha më tej, se arratisja e Balilit për kaq kohë nuk është rastësi, por vjen si rezultat i ndihmës që i kanë dhënë pjesëtarë të administratës, nga policë deri tek punonjës të shërbimit sekret, të gjithë këta nën hetim, siç tha gazetari.
