“Një mbrëmje për Amatricen” ishte iniciativa e Zonjës së Parë Odeta Nishani, e cila zhvilloi një mbrëmje bamirësie kushtuar qytetit Amatrice në Itali, që u shkatërrua nga tërmetet e gushtit dhe tetorit të vitit të kaluar.
“Kjo mbrëmje është për t’i shprehur shtetit fqinj Italisë afrimitetin dhe ngushëllimet tona më të përzemërta për tragjedinë e ndodhur nga tërmeti i disa muajve më parë. Populli shqiptar njihet për bujarinë dhe solidaritetin në çdo situatë, por me Italinë jam e bindur që çdo shqiptar përveç solidaritetit njerëzor ndjen dëshirën për ta falënderuar dhe shprehur mirënjohje për sa vendi fqinj dhe populli italian i ka dhënë Shqipërisë dhe shqiptarëve për më shumë se çerek shekulli demokraci”, tha Zonja e Parë Odeta Nishani.
Të pranishëm në këtë mbrëmje, veç ambasadorit italian në Shqipëri ishin dhe përfaqësues të ardhur nga Amatrice, të cilët theksuan se kjo është një shenjë e fortë e lidhjes mes dy vendeve. Fondet e mbledhura nga kjo mbrëmje do shkojnë për restaurimin e një vepre arti.
Zonja e Parë Odeta Nishani, “Një mbrëmje për Amatricen”
