Gjyqtari holandez Marc Bax, po trajnon gjyqtarët shqiptarë për figurën më të re që do të jetë në drejtësi pas ndryshimeve ligjore.
Pak ditë qëndrim në Shqipëri i kanë mjaftuar gjyqtarit Bax që të mësojë diçka nga Shqipëria.
“Mësova një shprehje të re dje. Isha në Korçë dhe mësova se ka një shprehje në Shqipëri. Edhe armikut më të keq i uroj të mos shkojë në spital apo në gjykatë. Që ju shpreheni për armikun më të keq, që të mos shkojë në spital unë mund ta imagjinoj, por gjykatë nuk e imagjinoj dot”, tha Marc Bax.
Përveç të qeshurave, kjo shprehje ka shkaktuar reagimin e menjëhershëm të gjyqtarëve. Sipas disave, kjo shprehje vjen nga Bibla, por për të tjerë gjithçka ka lidhje me klimën e politikës mbi pushtetin e tretë.
“Në dialogun e Jezusit, në një nga dialogjet me dishepujt, ku iu thotë fqinjëve të tij mos shkoni në gjykatë se aty do e pësoni keq. Populli e ka marrë këtë shprehje dhe e ka sjellë si diçka shqiptare, por kjo është një shprehje universale”, tha Asim Vokshi, gjyqtar i Gjykatës së Tiranës.
“Janë dy pushtete që për të shmangur përgjegjësitë e tyre i adresohen pushtetit të tretë, që deri dje ka qenë pa gojë, ka qenë jetim dhe asnjë nga institucionet ekzistuese që duhet ta mbrojë nuk e ka mbrojtur gjyqësorin”, tha Gerd Hoxha, kreu i Unionit të Gjyqtarëve.
Gjyqtari holandez habitet si e perceptojnë drejtësinë kolegët e tij shqiptarë
