Ministri i Drejtësisë, Ylli Manjani, ka reaguar sot lidhur me deklaratën e një dite më parë të Ambasadorit të SHBA-së, për mosarrestimin e Klement Balilit.
Ministri i dha një “kolpo” Policsë, duke e quajtur këtë një “ping-pong” për shmangien e përgjegjësive, ndërsa sipas tij, ligji e përcakton qartë kush arreston e ndalon.
Këtë deklaratë, ministri i Drejtësisë e bëri në punimet e Forumit Ministerial të Ballkanit Perëndimor për Çështjet e Drejtësisë dhe ato të Brendshme.
Deklarata e plotë e ministrit të Drejtësisë Ylli Manjani
“Mbështes plotësisht shqetësimin e shprehur ditën e djeshme nga Ambasadori i Shteteve të Bashkuara të Amerikës, z. Donald Lu në lidhje me mos arrestimin e shtetasit Klement Balilit.
Gjej rastin t’ju informoj, se sikurse edhe mund të jeni në dijeni prej 7 muajsh dhe në mënyrë të përsëritur e kam shprehur dhe publikisht këtë shqetësim.
Mostrajtimi apo trajtimi i gabuar i kësaj çështje nuk mund t’i barazojë institucionet e shtetit në përgjegjësi dhe as të luhet ‘ping-pongu’ i radhës.
Ligji shqiptar përcakton qartë se kush arreston, kush ndalon, kush akuzon dhe kush dënon persona të përfshirë në shkeljet e ligjit.
Ministri i Drejtësisë vetëm ndihmon me transmetim letër-porosish dhe/ose përkthim zyrtar të dosjeve. Këtë detyrë e kemi bërë në kohë rekord.
Kush ka kuriozitet mund të vijë në pranë institucionit t’i verifikojë, sipas rregullave të informacionit të klasifikuar.
Ping-pongun e përgjegjësive e kam denoncuar gjithnjë si të keqen më të madhe që ka sot sistemi.
Prandaj askush të mos fshihet pas alibive të sajuara, por të marrë përgjegjësitë që i jep ligji dhe t’i ushtrojë.
Përsëris qëndrimin tim të palëkundur se kushdo që ka shkelur ligjin duhet të ndëshkohet pa dallim!”, thuhet në deklaratën e Manjanit, të shpërndarë nga Ministria e Drejtësisë.
