Prej dy javësh numri i qytetarëve që kanë kërkuar ndihmën e mjekëve pneumologë në Korçë është rritur ndjeshëm. Rreth 40 persona në ditë, kryesisht të moshuar, u janë drejtuar bluzave të bardha për mjekim apo shtrim në spital.
Sipas mjekëve të Spitalit Rajonal Korcë , tymi i çliruar nga djegia e druve të zjarrit por edhe mjegulla e dendur e cila mbuloi Korçën për shumë ditë para mbërritjes së dëborës, ka shkaktuar shqetësime shëndetësore tek qytetarët.
“Temperaturat me minus, mjegulla dhe koha e ftohtë janë ndër shkaqet kryesore që shkaktojnë kataret stinore, që manifestohen me kollë, me gëlbazë, teshtima, temperaturë, dhimbje në gjoks e ankesa të tjera thotë mjeku pneumolog, Thoma Nini.
Mjekët këshillojnë masa paraprake në këtë periudhë, vaksinën anti-grip për ata që vuajnë nga sëmundjet pulmonare, kardiake, apo diabeti. Kujdes duhet bërë edhe për fëmijët.
“Të kenë kujdes ata që kanë reaksion nga mishi i pulës dhe veza që të mos e përdorin këtë vaksinë, sepse ka pasoja për jetën e tyre. Në këtë periudhë nga smogu e mjegulla janë shumë të zhvilluara infeksionet pulmonare, sidomos ato që shkaktohen nga mikrobet që janë parazitë në fytin e njeriut si stafilokoku, streptokoku dhe pneumokoku”, nënvizon mjeku Nini.
Mjekët sugjerojnë që mjediset ku jetojnë të sëmurët pulmonarë dhe fëmijët duhet të jenë të ajrosura mirë. TCH
Smogu problem në Korçë, mjekët paralajmërojnë
