Sekretari për Çështjet Ligjore dhe Zgjedhore në Partinë Demokratike, Marash Logu, akuzoi qeverinë për shkelje të Kushtetutës dhe Kodit Zgjedhor, duke deklaruar se Bashkia e Rrogozhinës vijon të drejtohet prej gjashtë muajsh nga një kryetar i komanduar, pas dënimit të formës së prerë të ish-kryebashkiakut Edison Memolla.
Sipas Logut, më 9 shkurt 2026, Gjykata e Posaçme e Apelit e shpalli përfundimisht fajtor Edison Memollën për korrupsion aktiv në zgjedhje, duke e dënuar me një vit burg. Ai u dënua për ndërhyrje në favor të një qytetareje gjatë fushatës së zgjedhjeve të pjesshme të 6 marsit 2022, duke i premtuar se do t’i paguante detyrimet e energjisë elektrike.
PD thekson se pas vendimit përfundimtar, Prokuroria e Posaçme njoftoi institucionet për ekzekutimin e dënimit, ndërsa Këshilli Bashkiak i Rrogozhinës dhe Prefekti i Qarkut Tiranë informuan zyrtarisht për përfundimin e mandatit të kryebashkiakut dhe krijimin e vakancës.
Sipas Logut, në zbatim të Kodit Zgjedhor, Këshilli i Ministrave duhej të njoftonte menjëherë Presidentin e Republikës për shpalljen e zgjedhjeve të pjesshme vendore, të cilat, sipas tij, duhej të ishin zhvilluar brenda 28 marsit 2026.
“Megjithëse kanë kaluar rreth gjashtë muaj nga krijimi i vakancës, nuk rezulton që qeveria të ketë njoftuar Presidentin dhe as të jetë caktuar data e zgjedhjeve,” deklaroi Logu.
Ai shtoi se aktualisht Bashkia e Rrogozhinës drejtohet nga Andi Proshka, të cilin e cilësoi si kryetar të komanduar dhe jo të zgjedhur nga qytetarët. Sipas PD-së, Proshka është bashkëshorti i Erinda Memollës, vajzës së xhaxhait të ish-kryebashkiakut Edison Memolla.
Në përfundim, Logu akuzoi kryeministrin Edi Rama se po mban në detyrë një drejtues të pakonfirmuar me votë, duke pretenduar se ish-kryebashkiaku Edison Memolla vijon të ushtrojë ndikim mbi bashkinë, pavarësisht dënimit të tij me burg.a.b
