Ish-ministri i Mjedisit, Planifikimit Hapësinor dhe Infrastrukturës në Kosovë, Liburn Aliu, është paraqitur këtë të mërkurë në Prokurorinë Speciale të Kosovës, ku është marrë në pyetje në kuadër të një hetimi për veprën penale të dyshuar të “keqpërdorimit të detyrës zyrtare”, raportojnë mediat në Kosovë.
Aliu, i cili aktualisht ushtron detyrën e drejtorit të Autoritetit Portual të Durrësit në Shqipëri, ka nisur intervistimin në orët e paradites para prokurorëve specialë. Deri më tani nuk janë bërë publike detaje të tjera mbi çështjen që po hetohet.
Liburn Aliu drejtoi Ministrinë e Mjedisit, Planifikimit Hapësinor dhe Infrastrukturës në Kosovë deri më 27 gusht 2025, kur dha dorëheqjen pas zgjedhjes së Dimal Bashës në krye të Kuvendit të Kosovës. Pas largimit të tij, detyrën e ministrit e mori zëvendësi i tij i atëhershëm, Hysen Durmishi.
Në tetor të vitit 2025, Aliu u emërua drejtor i Autoritetit Portual të Durrësit. Paraqitja e tij para Prokurorisë Speciale e rikthen në fokus të hetimeve në Kosovë, ndërsa organi i akuzës po vijon veprimet për të sqaruar dyshimet që lidhen me ushtrimin e detyrës gjatë kohës që ishte ministër.
