Më së fundit dhe një nga terrenet e fundit sportive për fëmijët dhe të rinjtë në Durrës është dhënë si shesh ndërtimi. Parku i famshëm sportiv i qytetit tashmë nuk do të jetë më në shërbim të zhvillimit të aktiviteteve sportive,por do të kthehet në një godinë shumëkatëshe, duke pasur fatin e shumë objekteve të tjera në Durrës, raporton gazeta “Shekulli”.
Ndonëse qeveria Rama ka folur aq shumë për zhvillimin e sportit dhe shtimin e terreneve sportive,me sa duket gjithçka ka qenë një gënjeshtër e madhe. Këshilli bashkiak i Durrësit ka marrë vendimin për dhënien e objektit me sip 980 m², te Parku Sportiv në dispozicion për ndërtim nga shoqëria private, kundrejt shkëmbimit në natyrë dhe detyrimit të sipërmarrësit që të dorëzojë sipërfaqe ndërtimore bruto prej 1.100 m² në favor të bashkisë Durrës. Ndonëse në raste të tilla pronarët e truallit mund të kompensoheshin nga shteti për të mbrojtur prona të rëndësishme publike, kartonët e Këshillit Bashkiak kanë anuar nga krahu i ndërtuesve.
Një nga përfaqësuesit e djathtë të këshillit bashkiak, Ivi Jorgoni, ka ngritur shqetësimin se ku do të luajnë tashmë fëmijët dhe të rinjtë në Durrës, kur dihet se qytetit i mungojnë mjedise të tilla.
Gjithsesi reagimet në këshilli kanë qenë të pakta, pavarësisht se flitet për një nga pasuritë e qytetit të Durrësit.
Ndërkohë këshilltarët e LSI-së kanë akuzuar kryebashkiakun se ka munguar transparenca dhe diskutimi me grupet e interesit për hartimin e paketës fiskale.
Durrës, bie edhe sheshi i fundit publik, “Parku Sportiv” shndërrohet në park të kullave shumëkatëshe
