Kreu i Inspektoriatit të Punës, Dritan Ylli ka reaguar ndaj kryetarit të Bashkisë, Erion Veliaj mbi kontrollin e punëtorëve në Sharrë. Mbrëmjen e kaluar, në emisionin “Top Story”, Erjon Veliaj tentoi të heqë përgjegjësinë për vdekjen e Ardit Gjoklajt në Sharrë, duke ia lënë fajin Inspektoriatit të Punës. Sipas kryebashkiakut, fatkeqësia mund të kishte ndodhur në secilin nga 100 kantieret që ka hapur Bashkia, tha Veliaj duke ngritur supet.
“Kompania që u paraqit, nëse provohet, nëse është e vërtetë, që e kanë shkelur Kodin e Punës le të përgjigjen para drejtësisë. Ky shtet ka inspektorë për çdo gjë, ka Inspektoriat të punës, inspektorët e rregullave të punës të vepronin”, u shpreh Veliaj.
Ndërkohë, gjatë emisionit, Dritan Ylli i LSI, reagoi duke deklaruar se nuk ka qenë kompetencë e Inspektoriatit të Punës kontrolli i kushteve ku punojnë të punësuarit në Sharrë. Sipas tij kjo është kompetencë e bashkisë.
Po sot, burime zyrtare të Inspektoriatit ët Punës, sqaruan se për këtë institucion “nuk ekzistonte” dhe ishte një kompani “fantazmë”, sepse bashkia dhe kompania në fjalë, nuk kanë denjuar asnjëherë që të dërgojnë në Inspektoriat sipas ligjit, shkresën ku njoftohet fillimi i aktivitetit, numri i punonjësve dhe standardet e sigurisë në punë.
“Është e vërtetë që Inspektoriati i Punës ka detyrim ligjor që të kontrollojë çdo aktivitet ku ka të punësuar, të identifikojë nëse ata janë të siguruar dhe kushtet e sigurisë në punë. Por në rastin konkret nuk kishte se si ta kryente këtë, pasi kompania me të cilën kishte nënshkruar kontratë kryetari i bashkisë Erion Veliaj, për institucionin tonë “nuk ekzistonte”. Themi nuk ekzistonte, pasi bashkia dhe kompania në fjalë, nuk kanë denjuar asnjëherë që të dërgojnë në Inspektoriat sipas ligjit, shkresën ku njoftohet fillimi i aktivitetit, numri i punonjësve dhe standardet e sigurisë në punë. Pra për shtetin ajo kompani ka qenë fantazmë dhe ka ekzistuar vetëm për kryetarin e bashkisë”, saktësuan burimet nga Inspektoriati i Punës.
DEKLARATAT/ Përgjegjësia për vdekjen e Arditit në Sharrë, fut në “luftë” Erion Veliajn e PS-së dhe Dritan Yllin e LSI-së
