Masa të rrepta sigurie dhe një hotel i gjithi i prenotuar, madje edhe me staf të reduktuar, të zgjedhur nga vetë spanjollët. Ish-kampionët e botës dhe Europës mbërritën të premten në mbrëmje në qytetin verior, teksa u pritën nga dhjetëra tifozë shqiptarë, të cilët mendonin se mund të bënin foto me yjet e Spanjës, shkruan Panorama.
Megjithatë, kjo ishte e pamundur, pasi forcat e rendit kishin rrethuar “Grand Hotel Europën”, duke mos lënë askënd t’u afrohej spanjollëve.
Sapo autobusi ndaloi, lojtarët zbritën një nga një, por vetëm tre prej tyre u dalluan mbi të gjithë. Andres Iniesta, Alvaro Morata dhe Diego Kosta ishin të vetmit që buzëqeshën pas thirrjeve të vazhdueshme të tifozëve shqiptarë.
Yjet e tjerë të Spanjës, përfshi mbrojtësit Pike dhe Ramos, u futën menjëherë në hotel me një pamje tepër serioze. Për të pasur gjithçka nën kontroll, mësohet se Federata e Futbollit të Spanjës ka prenotuar gjithë hotelin. Gazeta zbulon se kostoja për dy net ka shkuar 130 mijë euro. Edhe dje gjatë paradites ishte thuajse e pamundur që të afroheshe në hotelin ku janë akomoduar spanjollët.
