Besohet se Federata Shqiptare e Futbollit ka arkëtuar rreth 600 milionë lekë nga shitja e biletave për ndeshjen e sotme Spanjë-Shqipëri.
Të gjitha biletat janë shitur duke mbushur plot kapacitetet e stadiumit “Loro Boriçi” që mban 15.990 vende. Në shitje “online” dolën për një kohë shumë të shkurtër pak bileta, në një kohë që në treg ishte thuajse e pamundur që ta siguroje. Ashtu si në sfidën ndaj Serbisë të luajtur në Elbasan vitin e kaluar, biletat “avulluan” menjëherë, shkruan panorama sport.
180 mijë lekë të vjetër kushtonte një biletë në zonën VIP të stadiumit, por duhet thënë se në këtë pjesë, ashtu si edhe në një pjesë të tribunave kryesore A dhe B, FSHF-ja bën dhurata.
80 mijë lekë kushtonte një biletë në tribunat kryesore, në një kohë që në të tjerat çmimet ishin normale dhe varionin nga 10 mijë deri në 30 mijë. Duke bërë një llogari të thjeshtë, shuma totale që pritet të arkëtojë FSHF-ja në këtë rast shkon në rreth 640 milionë lekë të vjetër.
