Ish-kryeministri Sali Berisha bëri një deklaratë të fortë sot nga Kuvendi i Shqipërisë, kur tha se organizatat terroriste merren tashmë edhe me drogë, e që shumë shpejt ISIS të financohej me kanabisin shqiptar. “Miniera e floritit për ekstremistët e Shtetit Islamik do të jetë kanabisi në Shqipëri”, tha Berisha duke i bërë thirrje komunitetit ndërkombëtar për ndërhyrje.
Berisha e konsideron këtë një rrezik jo vetëm për vendin tonë, por edhe kërcënim për aleatët e NATO-s ku Shqipëria është e anëtarësuar.
“Një vend aleat i NATO-s nuk mund të bëhet kërcënim për aleatët e saj. Në dhjetëra miliardë që burojnë nga narkotrafiku është futur edhe dora e zezë e ISIS që nuk e ka asnjë problem që të financohet me kanabisin shqiptar. Vendi është më i kërcënuar se kurrë. Dhe tani Shqipëria po bëhet një kërcënim dhe rrezik për NATO-n, një kërcënim për Italinë dhe Greqinë. A ka përgjegjësi këtu apo jo? NATO të marrë në monitorim me urgjencë situatën në vend. Rreziku është se shumë shpejt Shqipëria do të jetë një financues i madh i terrorizmit ndërkombëtar”
, –tha Berisha.
Deputeti demokrat tha se siguria kombëtare është e kërcënuar, duke ju referuar situatës së kultivimit të lëndës narkotike në vendin tonë. Po ashtu, Berisha bëri një tjetër akuzë të fortë kur tha se në Shqipëri janë duke u ndërtuar aeroporte të rinj në mënyrë që të shërbejnë për transportimin e drogës jashtë Shqipërisë me avionë.
“Sot unë dua të jap alarmin, të shpreh shqetësimin tim më të madh për dramën në të cilën është zhytur Shqipëria. Sot siguria kombëtare është më e kërcënuar se kurrë, nga kohërat e luftërave gjer tani. Shqipëria është shndërruar në Kolumbinë e dikurshme jo të sotme të Evropës. Arat e deputetëve dhe politikanëve e ministrave kanë mbuluar vendin nga Pogoni në Vermosh. Asgjë s’kërcënon më sigurinë e këtij vendi sesa kanabisi. Kambanat bien për të gjallët jo për të vdekurit, se u kalua nga mushkonjat e aeroporteve te aeroporte për trafiqe kriminale qoftë kanabis qoftë kokainë qoftë armë. Dora e zezë s’ka asnjë pengesë që të shtrihet. A e dini që po ndërtohen aeroporte të tjera apo jo? Ta them unë se ku janë, po po për turizëm, po ndërtohen aerodrome të tjera për trafiqe kriminale, çfarë shteti jemi ne eksportojmë vdekje për aleatët tanë. Po ju besoni gënjeshtrat tuaj se ju nuk fluturoni me presh mbrapa por me para mbrapa, po po këtë keni ju mjetin e fluturimit”, – tha Berisha.
