Agjentë policie me origjinë shqiptare janë bërë objekt hetimi nga prokuroria në Holandë, me dyshimin se janë korruptuar. Sipas të dhënave të para dyshohet se ata u japin informacione grupeve kriminale shqiptare që veprojnë në vend.
Në Holande ka nisur një hetim në shkallë të gjerë për të luftuar korrupsionin në radhët e Policisë së Shtetit. Kjo pasi së fundmi disa skandale korruptive kanë përfshirë këtë organizatë, dhe për këtë arsye organizata për të drejtat e policëve kërkon ndryshime.
Sipas kësaj organizate, agjentët e policisë me kombësi të huaj janë nën presion për të furnizuar me informacione grupe kriminale të kombësisë së tyre. Sipas shoqatës për të drejtat e policëve, kjo ndodh me agjentët me kombësi shqiptare, si dhe me agjentë marokenë dhe turq.
Disa agjentë e kanë denoncuar presionin e grupeve kriminale tek shoqata e policëve, por mbetet e paqartë nëse agjentë të tjerë kanë rënë viktimë të këtij presioni.
Kohët e fundit, vihet re një fuqizim i mafies shqiptare në Holandë. Vetëm në Amsterdam gjatë 4 muajve të fundit u arrestuan 60 shqiptarë të cilët ishin të përfshirë në tregtimin e drogave të forta në vend.
Si duket, prezenca e shtuar e krimit shqiptar, ka bërë që dhe sinjalet për korruptimin e efektivave shqiptarë të jenë më të qarta duke detyruar organizatën për të drejtat e policëve të japin alarmin për këtë fenomen. /ABCNews/
