Një tjetër person me probleme mendore, këtë herë në Rrogozhinë, ka ngritur në këmbë forcat e policisë së qytetit rajonal të cilat në bashkëpunim me repartin e RENEAs e kanë arrestuar pas gati 4 orësh negociata me të. Bëhet fjalë për shtetasin Gëzim Mustafaj, 47 vjeçari i cili jeton në fshatin Gosë, me probleme të shëndetit mendor. “Arrestimi i tij është bërë pas marrjes së një telefonate ku dyshohej se, në Gosë, shtetasi i mësiperm ka kanosur dajën e tij shtetasin L.Z, vjeç 56, banues në Durrës.
Ky shtetas për disa ditë, nuk ka lejuar të dalë nga banesa nënën N.M, vjeç 76, gjithashtu nuk e linte të trajtohej me ushqim dhe ilace dhe gjendja e saj shëndetësore sa vinte dhe rëndohej. Ajo ishte rezidente në Itali”, thuhet në njoftimin e policisë. Pas negociatave u arrit të neutralizohej i sëmuri mendor dhe është dërguar tek Spitali Nr 5 në Tirane për mjekim më të specializuar. Mbi të rëndojnë akuzat e parashikuara nga Nenet 84, 110/2 e 238 të Kodit Penal.
