Emisioni investigativ “STOP” këtë herë sjell në vëmendje Kompaninë e naftës, “ARMO” dhe misterin që fshihet pas saj.
Në një intervistë për mikrofonin e “STOP”, ish- Ministri i Ekonomisë Zef Preçi, hedh dritë mbi këtë mister, duke shpjeguar problematikën e këtij privatizimi dhe vënë në pah disa pika të errëta .
Preçi thotë se ende nuk ka një përgjigje se kush e bleu atë, për çfarë shume, dhe mbi të gjitha çfarë ndodh me borxhet e ARMO-s ndaj shtetit dhe bankave!
Në fund të tremujorit të parë të 2016-s, detyrimet e Kompanisë “ARMO” ishin 595 milionë dollarë ose sa 5% e Prodhimit të Brendshëm Bruto të vendit.
Pak ditë më parë është bërë me dije se Kompania ARMO iu shit një firme të regjistruar në ishujt Virxhin, Offshore. Cilat janë pikat e errëta të këtij procesi?
“Dihet që menaxhimi i kësaj prone publike pas privatizimit është bërë në mënyrë grabitqare. Gjatë tre viteve të fundit nuk ka një bilanc të kësaj kompanie. Kjo kompani është ndër borxhlinjtë më të mëdhenj në banka, pra zë një peshë të rëndësishme në kreditë e këqija. Po kështu dihet se kjo kompani zë një peshë shumë të rëndësishme në detyrimet fiskale të papaguara, por ndërkohë nuk është sqaruar as burimi i kapitalit të zotëruesve më të fundit të kësaj kompanie, vendas, të huaj, të përzier, të ligjshëm, të paligjshëm etj. sepse deri më sot Shqipëria është nga të vetmet vende të botës që eksporton të gjithë sasinë e naftës që prodhon dhe importon gjithë sasinë e naftës që konsumon”.
Në fund të 3-mujorit të parë të 2016-ës detyrimet e Kompanisë ARMO llogariteshin në 595 milionë dollarë ose 5 % e PBB (Prodhimit të Brendshëm Bruto) të vendit. Çfarë ndodh me borxhet në këtë proces shitjeje?
“Marrja në dorëzim nga pronari apo pronarët e rinj bëhet kundrejt likuidimit, shlyerjes së menjëhershme apo pjesë-pjesë, por duke zbardhur gjendjen e kompanisë”.
“ARMO” u vu në sekuestro preventive në Gusht të vitit 2012 për shkak se kishte shumë borxhe. A mund të realizohet shitja në kushte të tilla?
“Shitja mund të realizohet sepse ai që e blen merr përsipër të shlyejë borxhet, detyrimet. Nëse dikush blen një kompani me detyrime, detyrimisht merr mbi vete detyrimet, dhe si rregull kur bëhet fjalë për pasuri të bllokuara bën zhbllokimin e tyre, d. m. th., që paguan palët ndaj të cilave detyrohet kompania në fjalë”.
D. m. th., sipas jush kjo shitje është komplet në rregull? Mund të bëhet?
“Në qoftë se vërtet është bërë, nëse nuk është një “flluskë sapuni”, si shumë të tjera, do të ishte e dëshirueshme që të hidhet dritë mbi transaksionet. Do të ishte lajm shumë i madh për të gjithë taksapaguesit shqiptarë, nëse Ministri i Financave ditën që inauguroi fillimin e punimeve të një kompanie private, që nuk është shumë normale, por ndodh në vende si Shqipëria, të thoshte se kjo kompani ka shlyer detyrimin prej 60 milionë euro apo më shumë, sa i detyrohet tatime taksave”./TVKlan.al/
Për të ndjekur videon, klikoni këtu …
https://youtu.be/GkHb5HUatCQ
