Edhe pse kanë kaluar mbi 9 muaj që nga dita e firmosjes së gjobës nga Bashkia e Tiranës për Partinë Demokratike, asnjë punonjës i saj nuk merr përsipër autorësinë e shkrimit të këtij proces verbali.
ABC News ka mësuar se prokuroria e kryeqytetit po vazhdon hetimet për gjetjen e autorit të këtij falsifikimi, por që asnjë nga punonjësit e Bashkisë të pyetur nga grupi hetimor nuk e merr përsipër. E fundit që është pyetur nga prokuroria është shefja e kabinetit të kreut të Bashkisë së Tiranës Anuela Ristani. Kjo e fundit gjatë marrjes në pyetje është shprehur se ajo mbrëmjen e 8 dhjetorit 2015 ka firmosur disa dokumente, duke hedh dyshime se edhe gjobën ta ketë plotësuar ajo. Por gjatë kryerjes së akt-ekspertimit krahasuese të shkrimit të dorës së shefes së kabinetit dhe procesverbalit të gjobës, ka rezultuar se nuk është shkrimi i saj. Të ndodhur në këto kushte, prokuroria prej gati tre muajve i ka dërguar për ekspertizë krahasuese shkrimin e personit që i ka marrë në dorëzim bllokun e gjobave policit Besmir Karaj, i cili edhe e ka denoncuar këtë fakt. Por edhe pse kanë kaluar tre muaj, policia shkencore ende nuk ka kthyer një përgjigje që edhe organi i akuzës të marr një vendim për dosjen hetimore.
Nga ana tjetër, prokuroria nuk e ka parë të rrugës të marr në pyetje kryetarin e Bashkisë Erion Veliaj, edhe pse gjatë deklaratave të tij publike është shprehur se procesverbali i gjobës nuk është falsifikuar. Si dhe nuk është marr krahasimi i gjurmëve të shkrimit të tij për të parë nëse është ai përpilues i gjobës, siç ka pretenduar Partia Demokratike në daljet e saj para mediave.
Ndërkohë prokuroria ka regjistruar procedimin penal që në dhjetor të vitit të kaluar, kur efektivi i policisë bashkiake Besmir Karaj kallëzoi në prokurori falsifikimin e firmës së tij në gjobën që Bashkia i vendosi PD-së për dëmet e shkaktuara gjatë protestës së opozitës më 8 dhjetor.
Edhe firmëtarin e këtij dokumenti më poshtë, nuk e gjen dot prokuroria…
