Policia ka vijuar me verifikimet, në lidhje me ngjarjen e ndodhur në fshatin Qatrom, në të cilën u mbytën dy kushërinj.
Në vijim të verifikimeve dhe hetimeve të kryera, në lidhje me ngjarjen e ndodhur më datë 19. 08. 2016, në fshatin Qatrom, në të cilën humbën jetën shtetasit A. T., dhe R. T., duke u mbytur në vendin e quajtur Gropa e Danielit, policia sqaron se, specialistët e Seksionit për Hetimin e Krimeve të Korrupsionit, në Drejtorinë Vendore të Policisë Korçë, filluan procedimin për veprën penale, “Shpërdorimi i tokës ”ndaj V. K., 53 vjeç, banues në Korçë, me detyrë Administrator i një shoqërie private në fushën e qeramikës.
Nga verifikimet e kryera kjo shoqëri, ka rezultuar me mangësi në dokumentacionin e paraqitur, si edhe në mënyrën e shfrytëzimit të tokës, pikërisht në gropën ku humbën jetën, dy kushërinjtë.
Gjithashtu ka filluar procedimi në gjendje të lirë, për veprën penale “Shpërdorimi i detyrës” në ngarkim të F. S., 57 vjeç, banues në Korçë, me detyrë ish-Kryetar i Komunës Drenovë dhe M. M.,31 vjeç, banues në fshatin Qatrom, me detyrë administrator i Njësisë Administrative Drenovë.
Këta persona duke qenë me detyrë ish-kryetar dhe Administrator, dyshohet se nuk kanë marrë masat e nevojshme, për kontrollin e aktivitetit të ushtruar, në territorin e kësaj njësie.
Materialet për veprime të mëtejshme hetimore, i kaluan Prokurorisë të Rrethit Gjyqësor Korçë.
PËR HERË TË PARË/ Procedohen tre persona për mbytjen e dy kushërinjve në Korçë
