Pistoleta e bllokuar
Specialistët për Krimet në Komisariatin e Policisë Krujë arrestuan, Erind Balla, Rilind Leka dhe Indrit Leka të tre banues në Borizanë,Thumanë, Krujë.
Arrestimi i tyre u bë pasi më datë mbrëmjen e kaluar në Borizanë, pas një konflikti për motive të dobëta, vëllezërit Leka, kanë kanosur me armë gjahu shtetasin Erind Balla. Gjithashtu edhe shtetasi Erind Balla ka kanosur me armë zjarri tip pistoletë vëllezërit Leka duke qëlluar disa herë në ajër.
Me të marrë njoftimin menjëherë në vendngjarje shkuan Efektivat e Policisë, të cilët rrethuan dhe këqyrën vendin e ngjarjes, duke bërë të mundur sekuestrimin e provave materiale, identifikimin dhe kapjen e menjëhershme të autorëve.
U ushtruan kontrolle në banesat e të arrestuarve dhe në automjetin tip “Opel Vectra”, me targa AJ 067 XË, të cilës i ishin thyer të gjitha xhamat, në pronësi të shtetasit Erind Balla.
Gjithashtu, mësohet se filloi procedimi penal në gjendje të lirë në ngarkim të S. Leka 39 vjeç, banues në Borizanë, Krujë.
Materialet i kaluan për veprime të mëtejshme Prokurorisë së Rrethit Gjyqësor Krujë për veprat penale:
“Kanosja”, “Prodhimi dhe mbajtja pa leje e armëve luftarake dhe e municionit” dhe “Prishja e qetësisë publike” parashikuar në nenet 84, 278/5 dhe 274 të Kodit Penal, në ngarkim të shtetasit Erind Balla;
“Kanosja”dhe “Shkatërrimi I pronës” në bashkëpunim parashikuar në nenet 84, 150, 25 të Kodit Penal në ngarkim të shtetasve Rilind dhe Indrit Leka; “Shkatërrimi i pronës” në bashkëpunim parashikuar në nenin 150, 25 të Kodit Penal, në ngarkim të shtetasit S. Leka.
Të arrestuarit
• Erind Balla 32 vjeç, banues në Borizanë,Thumanë, Krujë;
• Rilind Leka 40 vjeç, banues në Borizanë,Thumanë, Krujë;
• Indrit Leka 32 vjeç, banues në Borizanë,Thumanë, Krujë.
Sekuestruar në cilësinë e provave materiale
• arma e zjarrit pistoletë, tip TT, model 54, kalibër 7.62 mm, që i përkiste shtetasit Erind Balla;
• tre armë gjahu, të cilat u gjetën gjatë kontrollit të ushtruar në banesën e shtetasit Indrit Leka;
• 1 krehër me 6 copë fishekë pistolete, kalibër 7.62 mm, të cilat u gjetën gjatë kontrollit të ushtruar në makinën e shtetasit Erind Balla;
• 2 gëzhoja mod 54, kalibër 7.62 mm, në vendin e ngjarjes.
