Italiani 51-vjeçar Ivano Palermo është lënë në burg, ndërsa dy ditë më parë u kap me një anije rreth 6 metra të gjatë, me 118 kg marijuanë.
Ai është rrëfyer para gjyqtarit Stefano Sernia se për të çuar drogën në Lecce është paguar për 5 mijë euro. Droga vinte nga Shqipëria, sipas italianit 51-vjeçar dhe atë e kishte lidhur me trafikantët shqiptar një person (i dyshuar po shqiptar).
Ky i fundit i kishte dhënë edhe një telefon, tek i cili do t’i telefonin trafikantët kur të “zbriste” në tokën italiane.
Dy ditë më parë u zbulua varka 6 metra e gjatë dhe me motor të fuqishëm, e cila në pamje të parë nuk të linte asnjë përshtypje se ishte e ngarkuar me drogë.
Por pas një kontrolli të imtësishëm, në pjesën e poshtme dhe te vendi i timonit u zbuluan 34 pako të mëdha me marijuanë me një peshë totale 118 kg.
Droga nëse hidhej në treg kapte vlerën e 1 milion eurove. Hetimet tani janë përqendruar te marrësit e drogës në Itali dhe kanalet e furnizimit, që janë në Shqipëri. Për këtë mediat italiane shkruajnë se autoritetet shqiptare janë vënë në lëvizje. /TVKlan/
“Për të transportuar drogën nga Shqipëria në Itali më kanë paguar 5 mijë €”
