Vetëm pak orë para takimit të lajmëruar mes liderit të opozitës Lulzim Basha dhe Kryeministrit Edi Rama, një deklaratë e Deklaratë e Përfaqësueses së Lartë/Zëvendës-Presidentes Federica Mogherini për reformën e drejtësisë në Shqipëri, mund ta hedhë në erë këtë takim.
Deklarata qartazi nuk përmend opozitën në nevojën për konsensus në miratimin e refromës për drejtësi por i bën thirrje përgjegjësisë personale të secilit deputet për të votuar.
Është hera e parë që një zyrtar i lartë i BE-së, shmang opozitën nga reforma më qenësore që është kryer ndonjëherë në Shqipëri në deklaratën e vet duke e kanalizuar votimin për të përmes nje skeme aleancash fluide.
Ndërsa SHBA këmbëngul për konsensus dhe pret që takimi të ketë një finale pozitive për reformën, zyrtarë të BE po luajnë në një terminal tjetër, me sa duket të ndikuar nga ambasadorja e BE-së në Tiranë, Vlahutin e cila ka një axhendë të qartë pro Rama që kur ka ardhur në Tiranë.
Ja pjesa e deklaratës së Mogerinit që mund të shërbejë si flakë për konsensusin e afërt:
“Propozimi ligjor që ndodhet tashmë para Kuvendit pasqyron rekomandimet e Komisionit të Venecias dhe përputhet plotësisht me standartet evropiane. Është thelbësore që ky propozim të miratohet një shumicë prej 2/3 që kërkohet.
Bëhet fjalë për një votë për të cilën çdo deputet i Kuvendit, i cilitdo grupimi politik, mban përgjegjësi të veçantë”.
Opozita ka paralajmëruar një skenar të miratimit të reformës përmes blerjes së deputetëve të djathtë kohë më parë duke denoncuar cdo skemë të tillë dhe duke theksuar se do të bllokojë cdo tentativë që do cojë në miratimin përmes korrupsionit politik në Parlament të reformës.
Opozita po kërkon thjeshtimin e institucioneve të drejtësisë, një konstatim ky edhe i Venecias, ndërkohë që këmbëngul për mekanizimin e vendeve të rezervuara për dy institucionet kryesore të sistemit Këshillit të Lartë të Gjyqësorit dhe Këshillit të Lartë të Prokurorisë.
Opozita ka kontribuar dhe pranuar pjesën e parë të reformës që ka të bëjë me antikorrupsionin në drejtësi.
