Bushati: Shqipëria nuk ka pretendime territoriale, çështja çame të zgjidhet sipas praktikës gjermano-franceze

Ka përfunduar takimi midis dy ministrave të Jashtëm të Shqipërisë, Ditmir Bushati dhe të Greqisë, Nikos Kotzias.
Sikurse pritej, interesimi më i madh i gazetarëve ishte për çështjen çame.
Nga ana e tij, ministri i Jashtëm shqiptar ka bërë të ditur se zgjidhja e kësaj çështje do të vendoste drejtësinë e munguar. Për Bushatin, Shqipëria nuk ka pretendime territoriale, ndërsa ofroi si mode zgjidhje, shembullin gjermano-francez.
“Besoj isha i qartë për kompleksitetin e marrëdhënieve tona. Besoj se respektojmë pikëpamjet e ndryshme që kemi me ministrin Kotzias për disa prej këtyre çështjeve. Për sa na përket ne, çështja çame është pjesë që e ka zanafillën në shportën e problemeve që nga Lufta e Dytë Botërore, me lexime të ndryshme sot. Një trajtim realist do të zbuste tonet e diplomacisë dhe do të vendoste drejtësinë e munguar. Shqipëria nuk ka asnjë pretendim territorial. Shqipëria i është mirënjohëse Greqisë për mbështetjen në NATO e BE. Qasja jonë ka të bëjë me respektimin e të drejtave themelore të çamëve. Flasim për pengesa të karakterit diskriminues që duhet të zgjidhen duke kapërcyer këto të pengesa.
Në këtë proces duhet marrë shembull nga praktikat më të mira, gjermano-franceze, në respekt edhe të viktimave. Respektet reciproke të fqinjit dominojnë mbi çdo gjë tjetër. Të respektohen çamët jo ti diskriminojmë” u shpreh Bushati.
Për homologun grekë, përqasja për çamët është e ndryshme, ndërsa janë të njohura nga pikëpamja historike.
“Është e ditur që një grup i madh çamësh jetojnë në Shqipëri. Unë besoj se këta të kenë përfitime nga integrimi i Shqipërisë në BE. Janë disa çamë të myslimanilizuar që në vitin 1911 që sot janë qytetarë grekë. Ekzistojnë disa amë që bashkëpunuan me pushtuesit e Greqisë, të cilët u dënuan nga gjykata greke në bazë të ligjeve greke e ndërkombëtare. Në ndryshim nga praktikat ën Europë, këta nuk u ekzekutuan por u dëbuan nga vendi. Unë besoj se kur flasim për këtë kategori nuk nënkuptojmë çamët në përgjithësi apo Shqipërinë. Por duhet pasur kujdes që këta që nuk kanë jetuar asnjëherë në Greqi të trajtohen njëlloj. Ne kemi një përqasje të ndryshme dhe të gjitha janë të njohura nga pikëpamja e historisë”, u shpreh Kotzias.