Presidenti i Republikës, Nishani priti sot dhe zhvilloi një takim me Kryetarin e Lëvizjes “Vetëvendosje” Visar Ymeri dhe deputetin e Kuvendit të Kosovës, Albin Kurti.
Ky është një nga takimet e rralla të Presidentit me kornete politike radikale në Kosovë. Kreu i Shtetit shqiptar çmoi kontributin dhe rolin e Lëvizjes ‘Vetëvendosje” në zhvillimet politike të Kosovës si dhe në konsolidimin e institucioneve demokratike funksionale të shtetit më të ri në Ballkan.
Kryetari i Lëvizjes “Vetëvendosje” zoti Ymeri dhe deputeti i saj, zoti Kurti ndanë me Presidentin e Republikës së Shqipërisë këndvështrimet e tyre dhe të forcës politike që përfaqësojnë mbi zhvillimet aktuale dhe situatën politike në Kosovë.
Presidenti Nishani ritheksoi qëndrimin se çështjet me rëndësi madhore për të ardhmen e Kosovës, duhet të zgjidhen me maturi e urtësi politike, në qasje të plotë ligjore dhe në mbrojtje të interesave të shtetit të Kosovës, thuhet në njoftimin e Presidencës për këtë takim.
